اقلام النش

الاقلام كثيره .. منها القصصي و الروائي و الشعري و ...... صفحة لكل من اراد مشاركة الاخرين بكلماته

السلام عليكم

دي حاجه على خفييييف كدا .. ان شاء الله تعجبكم و مستنيين تعليقاتكم, حصل و نشرتها في الفيس بوك و حبيت اشارك بيها ناس النش حبايبنا
# للذين لا يعرفون موليتا هي منطقه عمليات بتروليه في جنوبنا الحبيب مثلها مثل هجليج, عدار و فلوج

من ذاكرة موليتا

في ذلك الصباح و انا اتناول الشاي مع والدتي كما جرت العاده لم اكن اتوقع ان يقطع حديثنا دخول جارتنا او صديقتي العزيزه الجاره و التي قل ترددها على بيتنا منذ ان التحقنا بالدراسه الجامعيه و فرقتنا المدن, حيث درست انا بجامعة الجزيره بمدني البعيدة عن موطني الحبيب امدرمان, وفترت العلاقة بيننا نوعا ما, رحبنا بها كثيرا و جلست بالقرب من امي, و اصبحنا نتجاذب اطراف الحديث, لا ادري اهي شجون الحديث الحديث التي جعلتنا نتطرق لمسألة الزواج و العزوبيه ام هي جارتي التي دفعتنا الي ذلك, و سألت امي قائله:

الجاره : انتي يا خالتي محمد دا دايرنوا جنبكم كدا لمتين ؟؟

امي : والله يا بتي العرس دايرنو ليه, بس شويه كدا ... العجله في المواضيع دي ما حبابها, بعدين هو زاتو مصعبها على نفسه

الجاره : كيف يعني ؟؟

امي : قال داير ليهو بت استاندر

الجاره : استاندر !!! كيف يعني ؟؟

امي : انا بعرفوا ... اهو قدامك اسأليه ... خاتي ليه مواصفات الا حور عين بالنسبه لبنات الزمن دا ... هييييي يا عيال ما تشغلوني بكلامكم دا, حللي دي في النار النمشي النشوفه ....

و توجهت امي الي المطبخ الذي نحن بقبالته نجلس في الصاله.

واصلت الجاره موجة حديثها الي

الجاره : و مواصفاتك دي كيفنها يا الشقي ؟؟؟

انا : والله زي ما قالت ليك امي كدا .. مواصفاتي دي شكلها استاندر لمن ماف طريقه, لمن وصلت لقناعه اني ما ممكن القاها في بت

الجاره : ممممممم, ولا حتي في مروه

تردد الاسم في اذني كثيرا ... مروه ... مروه ... م .. ر .. و .. ه ...

انا : مروه منو يا بت ؟؟؟ .... ما تكوني قاصده مرو...............

الجاره (مقاطعه) : ياها زااااااتا

انا : و الذكرك ليها شنو دي حسي ... ايييييييك زمن و الله

مروه هي تلك الفتاة التي احببتها اثنا دراستي الجامعيه, هي زميلة جارتي في الجامعه و كنت اقابلها ايام اجازتي عندما اذهب الي منزل الجاره .. يا الله ما احلاها و اروعها من ايام , و همت بخيالي بعيدا بعيدا وانا اتذكر نثريتي التي كتبتها حينما رأيتها لأول مره ...

" رباه اني اولد من جديد .. لم ادري ما اعتراني حينها سوى ان قاربي عاد للابحر من جدييد ... لست ادري ما الذي فعلته بي عيناها .. ما الذيييي........... "

الجاره : هيييييي يا ولد .. مشيت وين ؟ الواخد عقلك

انتبهت لها و قلت : بس ما قلتي لي الذكرك ليها شنو ؟

الجاره : هي الاتذكرت ما انا

انا : هي ؟؟؟ كيف ؟ ما فهمتك

الجاره : قاعده في الخرطوم

انا : شنووو ؟

الجاره : زي ما بقول ليك كدا .. لقت ليها وظيفه في الخرطوم و جات

انا : طيب ووو......

الجاره : ووو.. شنو ؟؟ قصدك انا حسي جايبا في سيرتها ليه ... صاح ؟

انا : لا ما كدا بس ....

الجاره : بس شنو يا مستهبل .. انت حركاتك دي ما بتسيبها كلو كلو

انا : اناااا ... كيف ؟

الجاره : خليني من كيف بتاعتك دي ..البت امبارح جاتني في البيت نظام بتسأل مني و كدا و كل شويه تجيب في سيرتك لمن قربت اجرها من يدها و اجيبها ليك

انا : بتجيب في سيرتي كيف يعني ؟؟

و جاء صوت والدتي من داخل المطبخ : يا ولد و دي دايرا ليها كيف ... الحاصل ليكم شنو يا اولاد الزمن دا !!! وقال داير مرا استاندرد قال .... سجمك

انا : أمي انتي سامعانا من قبييل ؟

الجاره (ضاحكه) : لقيتك صعبه يا خالتي ... اها قلت شنو يا ولد ؟؟

انا : قلت شنو في شنو يا بت ؟

الجاره : نحن من قبيييل بنقول في شنو ؟

انا : مروه

الجاره : بس دي البتتزكرا و تاني نو مور ... صاح ؟ ... يا ولد الموضوع اصلا كان عن شنو ؟

انا : هو كان في موضوع غيرها ؟؟ !!!!

امي : العرس يا قشااااار

انا : ايواااااا العرس .. اتزكرت .. بس بس

الجاه : بس شنو!! انتو من زماااان دايرين بعض

انا : ايواا ... بس دا كان من ... من زمااان

الجاره : من زماااان ..... و من زمن مستني عودة قلبي راجع

انا : يا سلاااام ... دا جدييد دا ... من متيين بتسمعي لعبد العزيز محمد داؤود يا بت ؟؟

الجاره : الليله ووووب ... الحقني يا خالتي ... ولدك دا حيجيب لي ضغط

امي : يا ولد ما تركز شويه

الجاره : من الاخر ... مروه قالت جاياني الليله الساعه عشره, وحسي الساعه عشره و نص, يعني بتكون جات و قاعده مع امي حسي .... نهايتو, تجي معاي ولا اخليك لعبد العزيز محمد داؤود

انا : كيف !!!! جاي معاك و نص و خمسه ... انا طالع يا امي

و مسكت بيسراي الجاره مستعجلا اياها و مدت يمناي و انا ما زلت بداخل الصاله مستعجلا نفسي لفتح باب

الشارع و ........ بوووووم ... بوووووو م .... بووووم

بسم الله .. دا شنو دا !!! ؟؟؟ مشيتي وين يا جاره ؟ ... جارة شنو !! انا زاااتي وين ؟؟

و نظرت اتفحص ما حولي, و اذا بي اجد نفسي علي سرير و عن يميني منضده و عن يساري التلفاز ... يا الله .. انها غرفتي بموليتا .. تبا" لك ... اهذا وقته يا موليتا ؟؟؟؟

لم يكن ذلك الصوت الرهيب (بوووم .. بوووم .. بوووم) الا صوت ال(pilling machine) و هي تضرب اعناق المواسير الفولاذ لترسلها الي اعماق امتار في باطن الارض و توقظني بصوتها المدوي, و تعود بي من هناك الي هنا و ياله من فرق "حاجه زي ما تكون محلق في العواصف فجأه تهبط في سكون"

تري ماذا سيحدث لو نمت مره اخرى و حلمت بموليتا .. اتراني استيقظ علي ترانيم صوت مروه ؟؟

والله يا جنكيز قصه رائعه جدا جدا ودايما متحفنا بالجديد وانشاءالله تنوم وتحلم بمروه اقصد موليتا

هههههههههههههههههههههههههههههههههههههههههههههههههههههههههه
انا قريت القصة دى قبل كدة لكن تاااااااااانى استمتعت بيها اكتر من الاول..
بس ياجنكيز حسى فى بليلة دى تانى البصحيك شنوووووووووو

تسلموا يا حلوين

بس يا نجيله بليلة دي هو فيها نوم !!!؟ الصحيان هين ... الله يعفينا من الخلا دا بالافضل ... قول آمين

عجيب وغريب ياجنكيز
الحقيقة اول مرة اقراها لانها ما ظاهرة خاتيها براها مطرفه كدة مالك
احيك ولازم نتابع معاك كل جديد
طلعت ماك هين

والله القصه جمييييييييييييييييييييييييييييييييييييييييييييله وتسلم ياجنكيز
تومي ياشمار انت اللي خلاك تتابع القصه عايز تعرف مروه دي شكلها كيف
وهي منو
قصه حلوه فعلا بس مالك وقفت

راااااااااائع يا اخونا جنكيز .... موهبة عالية في السرد .... وحقيقة القصة شدتني وما انتبهت إلا بعد انتهيت منها .

منتظرين جديدك